GOFEren kalitate-ekimenak

Gida hau Arabako Foru Aldundiko Gizarte Politika eta Gizarte Zerbitzuetako Sailaren "Hobeto Bizitzea" proiektuaren barruan kokatzen da. Proiektu horren helburua da ezgaitasuna duten pertsonentzako zerbitzuetan ematen den arretaren kalitatea hobetzea. Saila osatzen duten material guztiak bezala, gida hau hainbat profileko profesionalen arteko eztabaida- eta adostasun-prozesu baten emaitza da, eta interes komun bat partekatzen dute: ezgaitasunen bat duten pertsonentzako zerbitzuen bizi-kalitatea hobetzea, eta horretarako, arreta emateko eta laguntza emateko modua hobetzea. Gida egiten parte hartzea errazteko, eztabaida-talde bat antolatu zen, hauek osatua: ezgaitasuna duten Pertsonen Arloko arduradunak eta laguntza-teknikariak; ezgaitasuna duten pertsonentzako arreta-zerbitzuetan lan egiten duten taldeetako profesionalak; proiektua koordinatzeaz arduratzen den Gizarte Zerbitzuen Idazkaritzako kalitate-teknikariak; eta Eguía-Careaga Fundazioko SIIS Dokumentazio eta Ikerketa Zentroko profesionalak, proiektuaren kontzeptuaz eta diseinuaz, gida idazteaz eta proiektuaren dinamizazioaz ere arduratu direnak.

Gizakiarentzat, bere izaera sozial eta taldekoiagatik, komunikazioa ezinbestekoa da. Gure eguneroko bizitzan asko dira beste pertsona batzuekin komunikatzeko uneak, inguruabarrak eta testuinguruak, eta era askotako arrazoiak. Hori egitean, pertsona gehienok erraz eta naturaltasunez jokatzen dugu, eguneroko komunikazio-prozesuaren konplexutasunari buruz hausnartzeko beharrik gabe. Aldiz, ezgaitasuna duten pertsona askorentzat erronka handia da besteek adierazten dutena adieraztea eta ulertzea, dela hitzezko komunikazioaren bidez –hau da, hitzak erabiliz–, dela hitzik gabeko komunikazioaren bidez –hitzik erabili gabe–. Erronka horri aurre egiteko, ezinbestekoa da inguruan daudenek haiekin komunikatzeko modua eta edukia egokitzea, beren premietara, gaitasunetara eta lehentasunetara egokitzeko. Doikuntza-mekanismo hori da biderik eraginkorrena komunikazio-zailtasunak dituzten pertsonei laguntzeko eta eguneroko egoerak benetan kontrolatzeko, haien inguruan gertatzen dena ulertzeko eta beren iritziak, aukerak, sentimenduak, nahiak, beldurrak edo arbuioak adierazteko.

Jardunbide egokien gida honek jarduteko jarraibideak eskaintzen ditu prozesu horretan laguntzeko. Laguntza-zerbitzuen esparruan aplikatzeko eta, bereziki, profesionalei komunikazio-zailtasun horiek bizi dituzten pertsonekiko eguneroko harremanean orientatzeko prestatu bada ere, beste edozein testuingurutan baliagarria izan daiteke, zalantzarik gabe.